邊個笑我 Cheap 呂以村(大家食老闆)

邊個笑我 Cheap 呂以村(大家食老闆)


訪問大家食前，收集過各方意見，得出的整體印象只有一個字。是Cheap！ 「譁！個Logo勁抄大家樂，Cheap！」A說。 「門口放張兇神惡煞老闆大頭相，你估劉華咩？勁Cheap！」 B說。 「鋪頭成日播大陸卡拉OK音樂，阿姐又著曬大陸迷彩衫，好似返左大陸咁，Cheap到痺！」C說。 這麼Cheap的宣傳方法，到底是誰諗出來的？ 「係我。形象冇乜所謂啦！我覺得實際最重要，只要俾心機做好D野食，自然就有人欣賞啦！」他滿懷自信地說。 他叫呂以村，大家食的創辦人。93年從內地來港，縱使鄉音已戒掉不少，但人人還當他新移民辦。 習慣了！過去十四年，他背負著新移民的標籤，在歧視的目光下，為活著而奮鬥。 由一個推木頭車賣雞蛋仔的小販，默默努力奮發，成為今天擁有五間食肆、員工過百的飲食集團老闆。自創的手攪麵、削搖麵，連蔡瀾食過都親自撰文稱讚和肯定。 Cheap Cheap無罪，他其實像大部分香港人一樣，奉公守法，沒有為非作歹，靠一雙手和一副頭腦，為自己拚搏出一條康莊大道來，是典型的香港精神。 也許，你還是有萬千個理由笑他Cheap。但下次預備笑的時候，請先照照鏡子，也許你會見到一個形相，正在笑，笑得更加騎呢、更加Cheap。

我得承認，訪問呂以村，許多時候不能自制戴上了有色眼鏡。 楊利偉式的小平頭、軍綠色廉價抓毛外衣、緊身迷彩軍褲、黑色長軍boot，外形神高神大、相貌兇神惡煞……行出來，活脫脫就是一個省港旗兵形象，走在街上，真的如許冠傑所唱：「差佬都孟警棍！」 「哦！係呀！成日都俾警察查身份證呀！我都有朋友叫我去拍戲，真係客串做省港旗兵喎。」他一本正經傻傻的說。 他的品味，相當與別不同。人家生意人，愛抽菸飲酒打麻雀，他卻菸酒不好，獨愛吟詩作對寫書法，辦公室和五間鋪頭都貼滿他的「作品」，甚麼「一次不試您錯過，二次不來我過錯。」、「一家做麵大家食、大家食麵碗碗香。」、「用心創出美味送菜、用手搞出條條好麵。」吟來吟去，平仄對仗都難稱工整，taste的確有點……有點難以言傳的…… 另類。 到土瓜灣譚公道的鋪頭找他影相，他站在門外自己的大人像旁作食麵狀，幾個學生妹路過見到他，紛紛掩著嘴笑說：「咦~~ 老闆好Cheap呀！」 好！表面證供成立，徇眾要求，我一心要羅織他Cheap的「罪狀」，專登預備了幾條尖銳的問題。 「你個Logo係咪抄大家樂呀？」我問。 「係呀！最初貪佢多人識嘛。不過註唔到冊，我咪刪去兩條紅邊囉，結果註冊官話冇問題，我至夠膽用。」他答。 「門口張大頭相，兇神惡煞，又唔靚仔，唔驚嚇親人咩？」我問。 「哦！想人記得者。影相呢樣野，冇話嚇唔嚇親人既！冇手震就得啦！」他答。 「鋪頭成日播大陸歌、職員又著曬迷彩服，唔怕人地嫌你大陸Feel？」我問。 「大陸電器同機器係比較差，不過大陸D麵都幾好食呀。」他答。 答案有點騎呢，但又不得不承認，帶點坦白的可愛，而且一字一句，在他口中說出來，彷彿都帶著自信，無論問題有多難堪，他都是傻傻的笑笑便算，比我們動輒發怒的問責局長，EQ不知要高多少倍。 「哦！冇話嬲唔嬲既，做人既野，有時識得從對方角度睇，就會體諒好多D。」他圓融地說。

吃虧當是福

啊！原來他在體諒我，難為我還千方百計要讓他出醜，此刻真的讓人慚愧得有點無地自容。 這金剛不壞之身，不是一朝一夕得來的，是千錘百煉成果，是過去十四年在艱苦生活中，被琢磨出來的生存方法，慢慢蝕入了骨髓中，不經不覺，成為一種生活態度。 「做人冇野既，唔使驚人笑架，最緊要肯去捱，唔好得罪人，做野冇話蝕唔蝕底既，肯蝕底，反而人地會接受你添，你話係咪呢？」呂以村以一副哲學家的口說。 講蝕底，他最有資格。因為自從從鄉下海豐來香港，他就一直被人搵笨，搵足十四年，難以置信的是他一點也不介意。吃虧是福，反而成了他的人生座右銘。 他93年初來香港，第一份工是在潮州酒家做侍應，人家見他廣東話不靈光，就夾埋欺負他，寫單傳菜沒有他份兒，執檯擺位搬搬抬抬等粗重工夫，全由他去做，還要在背後嘲笑他是大陸燦。他聽了後，沒有嬲，反而一笑置之，叫自己更加落力工作。 「哦！做野係要埋堆既。自己唔識聽丫嘛！客人要紙巾，我就遞匙羹，條件比人差，麻煩到人地就唔好啦。想同事接納我，唯一方法就係勤力做野，做曬佢地唔願做既野囉！」他說。 一招「做曬人地唔願做既野」果然所向披靡，那班練精學懶的同事，見這傻仔這麼抵得諗，夾他做事有著數，很快就接納了他，連跳槽都預了他一份。 「我來港第二份工，就係得人介紹去蘭桂坊南蠻亭做學廚，主要切肉切魚做串燒。個陣時拍檔既香港人好懶，做一做又話要抖一抖，又成日要放假。我份人最冇所謂，邊個叫我頂我就頂，一條氣咁做，朝早八點做到夜晚四點，連踩兩更唔使停。個陣D日本師傅見到我咁勤力，咪教曬我野囉，結果兩年幾我就由學師升到大廚咯。」呂以村說。

榮升小老闆

吃虧賺了福，但卻賺不到銀紙。 做了大廚的他，人工不過一萬，交租已去了五千，水電煤又去了一截，兼且要照顧在港的老父，又要寄錢返鄉下，餘下的經已無幾。呂以村思前想後、輾轉反側，覺得工字始終出不了頭，就萌生做小生意的念頭。 一天，他路過街邊，見一雞蛋仔檔其門如市，覺得這玩意比打工還要好，從此一得閒便站在人家檔前，傻呼呼的看呀看，不明白的就膽粗粗的問人家，剛好那雞蛋仔檔主都是海豐人，同聲同氣，就傳授了做雞蛋仔的竅門給呂以村。 「我學識點整雞蛋仔，就返屋企買材料，照住佢部木頭車自己做，日日由伊利近街推車上堅道，再沿馬路推上薄扶林道香港大學附近，推到身水身汗，但係話曬係自己生意，辛苦都係開心既。」呂以村說。 他天生是有生意頭腦的。他知道賣雞蛋仔，全靠那香味招徠客人，因此他不用火水爐，專登用炭燒，貪炭燒的香味傳出來更香。果然，炭火一燒，吸引了一大班返學放學的港大學生如蟻附羶的蜂擁而至，生意好到連找錢也應付不了。 「個陣時我一底雞蛋仔賣七蚊，一日做過千蚊生意，找錢都找唔切，我索性『唱』定散銀，一戙三蚊，學生俾十蚊，就自己黎找錢囉。香港D大學生又好規矩喎，唔會亂咁找，冇話搵你笨。」他興奮地說。 第一次做老闆，第一次不用給人搵笨，第一次感受到前所未有的滿足感，做老闆原來咁過癮。於是98年，他看中了香港人喜歡食麵，就拿著賣雞蛋仔賺來的二十多萬積蓄，在深水步福榮街開首間大家食。還設計了一部攪麵機，把小麥粉做的麵糰用手攪成麵條淥熟。 麵條煙韌，花款變化又靈活又多，人家油渣麵旺場，他又做油渣麵，鄰鋪豬潤麵賣得，他又照辦煮碗，還碗碗賣平人家幾個銀錢。你笑他抄人野好Cheap，他偏偏又其門如市，日日賣個冇停手。Cheap，原來真的有股強韌的生命力，無論環境多惡劣，都能夠生存。

從軍練堅毅

強韌的生命力，多少與他的軍人背景有關。年輕的呂以村，是個如假包換的解放軍，當了六年兵，除了練成一副鋼鐵般的體格外，最厲害的就是習慣了在惡劣環境下求生。 「以前當兵好嚴格架！日日操練已經好辛苦，夜晚仲要冇覺好訓，因為長官最鍾意半夜三更突然敲鐘叫集合，一分鐘就要著好衫摺好床鋪，遲左又有排罰架！」 合理的要求，他當是鍛鍊。無理的要求，他當是磨練。在軍人的世界裡，從來沒有公平不公平，只有服從、服從、再服從。 紀律，早已是他生活裡的一部分，像呼吸一樣自然。看他每天的日程表，就是明證。每天七時，他就會彈起床做運動。八時回寫字樓批文件。十時開始巡鋪、走遍土瓜灣、佐敦、深水步、旺角。四時與員工開會，計劃明天的工作。晚上八時又巡鋪，順道瞭解客人意見，一直工作至午夜十二時，才拖疲憊的身軀回家，連星期日都做埋。 他真的是個工作狂，公司事無大小他都有份參與。由菜式構思、到影送菜相、寫文稿、找印刷、貼菜牌，連過千字的宣傳單張文案，他都一手包辦。 「冇辦法啦！唔夠人地叻，咪要勤力D囉，你話係唔係？」 跟他到汝州街的新鋪參觀，他一進鋪就二話不說拿起電鑽鑽呀鑽，又砌架又裝閉路電視，全部自己落手落腳，不知他是老闆的，還以為他是個裝修工人。 「唔……個維修工話有事唔得閒，冇問題既，好簡單者，我咪自己做囉。」他說。 他的勤奮，帶有一種很強的感染力，帶動身邊的人做事都很勤快。不論是工場還是麵鋪，員工都是快手快腳的，很有效率。 「老闆好勤力架！泥水、電器、電腦乜都係自己做，佢咁勤力，我地邊敢偷懶呀！」工場阿姐說。

犧牲了家庭

業務上了軌道，目前的他，已是個過百員工的大老闆。生意愈做愈大，他的工作也愈來愈忙。然而，事業成功是要付出代價的。 「呢排開新鋪，佢晚晚做到兩三點至返，年三十晚鋪頭D女工話要返鄉下，佢又冇計較做埋，真係想見下佢都難。」呂太望著老公抱怨地說。 老婆仔女，他是忽略了，三名子女，也只能放學後在鋪頭匆匆相見，兩歲大的小兒子和五歲的女兒一見到爸爸便摟著不放，又要攬時又要抱，逗得他笑到見牙唔見眼。 「爸爸成日都唔見人架啦！」二女嘉雯嘟著嘴說。 「佢呀！十幾年未放過假啦！嫁左佢咁耐，連度蜜月都冇呀！淨係去過一次桂林咁大把！」呂太在旁乘機又抱怨。 「唉！要搵食冇辦法啦！呢個世界，要做個好男人好難，我最多都係做個乖男人。乖男人唔去滾，好男人又要搵到錢，又要陪到屋企人，好難做呀！」呂以村漲紅了臉，一臉虧欠的樣子。 奮發拚搏十多年，如今好老闆、好兒子、好老公都做到了，唯獨與自己心目中那好男人的標準，始終還是差一點點。就是那一點點，在咫尺間，成了天涯。