死唔認輸就得架啦。奇蹟總係會響最後關頭出現既

死唔認輸就得架啦。奇蹟總係會響最後關頭出現既

星期二, 十一月 10, 2009
賭徒

我成日笑我老豆係個賭徒。每次過澳門既時候，佢總會擺低多少錢響賭場裡面。雖然同病態賭徒既程度佢仲差好遠，不過我係實實在在咁感受到，佢係多少享受緊，賭博過程之中果種可贏可輸既刺激感。

CK老豆一生人大起大落，試過賺好多好多錢，於是一下子帶領我地一家幾口舉家搬上半山豪宅，但係轉個頭又會變成生意失敗破產收場，讓當時仲年紀輕輕既小CK見識俾人封屋封舖既震撼場面。人生如戲，不停起起落落，「人生好玩丫」呢句我成日掛響口邊既說話，正正係佢自細教我既，根深蒂固。

CK老豆成日話，人生有好多場大大小小既賭博。你當然可以揀唔賭，但係除非你好知足啦，否則想贏你就要落注，落左注你就要接受有機會輸。願賭，你就一定要服輸。如果選擇唔賭既話，就要接受贏唔到大錢，唔好響度阿支阿左。

老豆係個膽好大既賭徒，原則上我係同意佢既「賭徒人生觀」。有目睹佢大起大落既親戚曾經問我，佢既賭徒性格究竟係點樣形成？咁我話，老豆係個幾十年前，搏左條命游水落黎既偷渡客，命都試過幾乎冇啦，仲有乜野會怕呢？做CK老豆個仔，其實幾得意既，由細到大一直目賭不下唔知幾多次起起落落，人生好似忽然變得豐富左，雖然我時有微言：老豆，你自己賭就好啦，硬係要拉埋阿媽同我一齊陪你賭…

*****

我公司裡面，幫我做信差既係一個同CK老豆年紀相約既人。我地個個都叫佢做榮叔。榮叔係個精神好緊張，兼且成日愁眉苦面既人。佢初初返工果陣，對我好避忌，直至我刻意同佢傾多d閒計，慢慢熟落左，佢先放低警戒，慢慢肯講下自己既野。

榮叔同CK老豆一樣，係幾十年前搏左條命走落黎既偷渡客。不過佢同CK老豆唔同，就係冇果種「賭徒」性格。佢話咁辛苦先落到黎香港，要好好珍惜眼前既生活。所以，工作同生活上都唔想冒咁多風險。一直以黎，佢都期望得到一個有人賞識既機會，希望可以憑住一次機會扶搖直上。不過佢話自己命唔好，一生勤力盡責，卻又一直遇唔到一個好伯樂，以致佢潦倒半生。

榮叔有個離左婚既老婆，有個同我差唔多年紀既仔。佢既婚姻唔好，佢歸咎佢人生既際遇唔好，令佢俾唔到好既生活屋企人。至於個仔，離婚既時候跟左佢阿媽，之後就好少再見面啦。最近一次見面，係個仔娶老婆擺酒。不過榮叔去飲既時候，發覺除左少量親戚認得之外，其他既賓客一個都唔識，自己作為新郎既老豆，同一個跟主人家生疏既賓客，一d分別都冇。

「老闆，人生本來就係苦架啦。」榮叔同我咁講。

「唔係喎，我老豆教我，人生應該係好玩架喎。」我笑住答。

「你咁好命，你既人生就梗係好玩啦，點同我地丫。」榮叔搖了搖頭。

我懷疑，大家既分別，可能只係你有冇落注，為自己既人生豪賭一場。

或者咁講有d政治不正確，不過響呢個大家都認為機會越黎越少既社會裡面，穩穩陣陣唔去賭，同賭輸左既分別，其實可能並唔太大。





星期一, 十一月 09, 2009
好命

有網友留言話我個BB好命，有個做老闆既老豆，呢個世界真公平。

每次遇到類似既留言，我總係唔知應該用乜野態度去面對。

作為一個準老豆，我當然希望將來我既仔仔，條命生得好一d，行少一d寃枉路。無可否認，錢係一樣「可能」令孩子將來既路變得平坦一d既工具，所以做父母既會努力搵錢，希望俾一個理想d既環境個小朋友成長。只不過呢個動作，係咪就突顯到世界既唔公平？我又唔能夠認同喎。

我只係覺得，凡事都有因果。只不過，因同果既關係，並未必發生響同一代人既身上。上一代人種既因，個果可能要去到我地呢一代人先會出現。同樣我地呢一代人所種既因，佢既果亦可能要去到往後既幾代人先會展現出黎。

唔公平嗎？最老土既講法係「呢個世界從來都冇公平」架啦。只不過，當你話自己條命生得唔好，覺得今時今日響香港地再冇機會上位發圍，呢個世界對你好唔公平果陣，世上仲有好多人兩餐都食唔飽。如果你係都要用呢個準則去衡量世界公唔公平，sorry，呢個世界仲有好多人，會因為你仲有兩餐食落肚，而抱怨你條命生得好過佢。同一個準則放落我既BB身上，到佢長大既時候一樣可以抱怨，點解佢老豆唔係 Richard Li而要係CK，呢個世界真係太唔公平啦。

冇得咁諗架，係咪？

我從來都唔會反對，今時今日社會上既機會變得越黎越少，貧富差距變得越黎越大。怨氣大，似乎係理所當然。我既唔係政客，亦唔係社會學家，面對呢d社會問題，我唔知道應該點樣解決。《人在中環》寫左就快4年，寫呢個撲同am730 既專欄，最開心既時候就係收到有網友同讀者既來信，話俾我聽因為睇到我某一篇文，然之後諗通左唔再浪費時間埋怨，決心努力諗辦法去改變現狀。然而4年裡面，我亦收過好多讓我唏噓不已既來信同電郵。有d朋友鬧我天真白痴，有d朋友會鬧我條命生得正所以講乜都係廢話，上左岸既人係永遠唔明白掙紮中既階層有幾痛苦，諸如此類。

我無意去爭辯我究竟明抑或唔明佢地有幾慘同有幾frustrated，不過對於網友話我自己條命生得 ok，我一直都只可以感恩，同埋儘量去飲水思源。世界本是唔公平呢一個事實，我一直都認同。只不過，認同呢個事實唔代表要日日企響度嗌慘，唔代表要仇視果 d條命生得比你正既人，因為當你不停做呢d野，以咁既態度做人，唔會令你既人生變得更公平，唔會令你生活得更快樂。

我係一個銅臭到極既生意佬，思維永遠都係要以實際為主。人生公唔公平呢d咁abstract既範疇，對我黎講冇意義既。天天同人比較亦都唔見得對自己有乜實際意義，反而諗下，點樣可以讓自己活得比昨日開心愉快，可能黎得實際一 d。

向前望啦，朋友。






星期五, 四月 23, 2010
失意與奇蹟

每次睇完留言，總係有點說話想講。

我比較幸運，響事業上浮浮沉沉，鬱鬱不得志既日子並唔算太長，hmmm，大概五、六年左右啦。果段日子距離今天已經越黎越遠，不過當時既感受還是記得蠻清楚。

好多成功左既人會同你講：「機會係自己爭取」，又或者甚麼「機會係留俾有準備既人」之類既說話。我當然唔能夠話呢 d所謂「名言」係廢話，不過當你失意徬徨既時候，你所面對既現實往往係，我幾咁努力爭取都好，但就硬係爭取唔到我想要既機會；又或者係，大佬，我明明準備好曬啦，但係 d機會就硬係唔留俾我，反而留曬俾班冇準備過既二世祖呀！

所謂際遇同命運，大概都係佢玩你既時間居多，你掌握到佢既時間其實甚少。

以前寫過，我老豆係個賭徒，成世人既際遇都大起大落。我事業上最浮浮沉沉果幾年，正值佢又生意失敗面臨破產，不過當時佢同我講左d野，雖然我估佢其實係隨口up居多，不過後來我又覺得幾受用：「阿仔，你知命運鍾意點樣玩你呀？拿，佢永遠唔會一鋪玩死你架，不過佢會不斷不斷咁打擊你，慢慢咁陰下陰下陰乾你，等你對自己冇曬信心，對呢個世界冇曬希望，等你慢慢相信，你呢一世都唔會有機會翻到身，到時候呢，佢就真係贏左你啦。」

「仔，等我話你知啦，你要贏到命運，一字咁淺，死唔認輸就得架啦。奇蹟總係會響最後關頭出現既。」

同我講呢番話果陣，老豆係個面臨破產，天天俾人上門追債，幾乎仲要禍及妻兒既過街老鼠，呢番說話響噹時對我黎講自然係好冇說服力，我覺得佢跌落地想執返渣沙多d囉。不過後來佢又再一次奇蹟地翻身，令到我心裡面又有d唔同既體會。

命運同際遇要贏你既方法，往往唔係要一鋪清你袋，一鑊過收你皮，而係透過恆久不斷既打擊，慢慢磨滅你既心志，令你唔再相信你會有希望，誤以為週圍既環境唔會再容得下你，令你相信你一定鬥佢唔贏。

命運贏你既方法，係折磨到你捱唔住自己選擇扯白旗投降，而唔係一刀統死你。

徬徨失意浮浮沉沉有幾難受，我明既。隨住年紀慢慢大，我開始理解到，呢個世界真正既遊戲規則，其實並唔係去鬥大家到底有幾「叻」，而係鬥大家到底有幾「韌」。鬥韌力既遊戲係一個好難玩既項目，原因係，永遠唔會有人話到俾你聽，你韌力既水平要去到幾多先能夠打贏際遇同命運，而且「打爆機」既「分數」要幾多，每個人都唔同。

唯一可以講既，呢個遊戲既特色係，只要你一日唔主動投降，你依然係未輸。

或者我講得太多。

常懷希望，祝大家有個愉快既週末